Çеçпĕл Мишши çуралнăранпа 125 çул çитнине халалланă поэзи каçĕ 

         И. Я. Яковлев ячӗллӗ Чӑваш патшалӑх педагогика университечĕнче чÿк уйăхĕн 12-мĕшĕнче Çеçпĕл Мишши çуралнăранпа 125 çул çитнине халалласа «Чунăмçăм, çунатăмçăм – таса юрату поэзийĕ. (Дорогая моя, лучезарная – поэзия чистой любви)» поэзи каçĕ иртрĕ. Чăваш наци конгресĕ ирттернĕ мероприятие пирĕн шкулта вĕрентекенсемпе вĕренекенĕсем те хутшăнчĕç. Илемлĕ юрăсем, Çеçпĕлĕн тарăн шухăшлă сăввисем янăрарĕç залра. Чăваш халăх поэчĕ Юрий Сементер паллă поэтăмăрăн Анастасия Червякова патне çырнă çырăвĕсем çинче уйрăмах чарăнса тăчĕ, вĕсенче чăваш каччин таса чунĕ курăннине палăртрĕ. Сăвăç кун-çулĕнчи тĕлĕнмелле самантсем те кăсăклантарчĕç итлесе ларакансене.

       Вĕренекенсемшĕн Чӑваш патшалӑх педагогика университечĕпе паллашма тÿр килни те усăллă пулчĕ. Çĕкленÿллĕ кăмăлпа тухрĕç унтан вĕсем. Тен, хăшĕ те пулин хăйсен пурнăçне малашне вĕрентекен ĕçĕпе çыхăнтарма та шутлĕç. 

                                                                                                          Ильина С. М.